Þorbjörn Þórðarson (f. 1983) er héraðsdómslögmaður og fyrrverandi fréttamaður. Hann starfar hjá Samherja hf.

Þorbjörn fékk réttindi sem héraðsdómslögmaður árið 2019. Hann útskrifaðist með meistarapróf í lögfræði frá lagadeild Háskóla Íslands árið 2013 og lauk B.A.-prófi í lögfræði frá lagadeild Háskóla Íslands árið 2011. Hann lauk stúdentsprófi frá Verzlunarskóla Íslands árið 2003.

Þorbjörn var lögmaður með eigin rekstur á árunum 2019–2023 og var með skrifstofu í Lágmúla 7 í Reykjavík. Þar deildi hann vinnuaðstöðu með á þriðja tug lögmanna sem hafa þar skrifstofur.

Áður en Þorbjörn hóf störf í lögmennsku vann hann í fjölmiðlum um rúmlega ellefu ára skeið. Hann var fréttamaður á fréttastofu Stöðvar 2, Vísis og Bylgjunnar frá 2009–2019. Þorbjörn var leiðarahöfundur á Fréttablaðinu um tveggja ára skeið frá 2016–2018 samhliða starfi á fréttastofunni. Þar á undan var hann blaðamaður á Morgunblaðinu frá 2008–2009 þar sem hann hafði verið ráðinn inn á ritstjórn eftir hæfnispróf. Þorbjörn var hluti af viðskiptaritstjórn Morgunblaðsins eftir bankahrunið og alþjóðlegu fjármálakreppuna 2008.

Á ferli sínum í fjölmiðlum var Þorbjörn tvívegis tilnefndur til blaðamannaverðlauna Blaðamannafélags Íslands fyrir rannsóknarblaðamennsku.

Þorbjörn er kvæntur og faðir tveggja drengja sem eru fæddir 2020 og 2023. Fjölskyldan er búsett á Seltjarnarnesi.